Berisha: Kabineti i piktorit, më i korruptuari në Shqipëri

Kryeministri në detyrë, Sali Berisha ka komentuar edhe sot mbledhjen e organizuar nga kryeministri i zgjedhur Edi Rama me kabinetin e tij qeverisës, të bërë publik vetëm një ditë më parë.

“Të dashur miq, sot Piktori mblodhi në zyrën e tij kabinetin e vet qeveritar që është dhe ekipi më i korruptuar që është instaluar ndonjëherë në Shqipëri”, shkruan Berisha në Facebook.

Sipas tij, “Vet Piktori, përveç aferave si ish-ministër i qeverisë Nano dhe kryetar 20% i bashkisë së Tiranës, është i vetmi kryeministër këto 20 vite në Europë që ulet në karrigen e kryeministrit me një vilë dhe një pallat 5 katësh me burim financiar të panjohur. Ministri i Financave Cani është guvernatori që pasi vodhi apo bashkëvodhi Thesarin e Shtetit dhe pas zhdukjes së tij deklaroi se Banka nuk ka patur në Thesar flori. Ministrit të Shëndetësisë Beqja është i vetmi që iu hoq mandati i deputetit sepse me baxhanakun e Piktorit kishte bërë kërdinë me tendera në bashki. Ai ka falsifikuar mijëra e mijëra pensione për të cilat po ndiqet. Ministri i Brendshëm Tahiri është i vetmi deputet me skaf dhe që iu arrestua i ati në flagrancë për kontrabandë ilaçesh dhe e ëma ndiqet për evazion fiskal në shumën 80 mijë euro. Ministri i Ekonomisë Ahmetaj është në ndjekje për vjedhjen prej 10 milionë euro që i ka bërë kompanisë Albtelekom me kompaninë e tij private Hermes. Ministri i Mirëqenies Sociale, më mirë të themi i mirëqenies personale, Erion Veliaj është bërë i famshëm si njeriu që me paratë e ‘Mjaft’ ndërtoi një vilë për vete dhe një vilë për Velicen pa firmosur në jetën e tyre ndonjëherë në bordero. Ai më pas, për të zhdukur gjurmët e kësaj afere, vodhi vetë kompjuterin e financave të ‘Mjaft’. Këto ishin vetëm disa nga aferat e disa prej anëtarëve të "ansamblit lukunia"! Këtij i thonë ndryshim! Përpara drejt Kleptokracisë”, komenton Berisha./Indeksonline/