Berisha: Media të vazhdojë mashtrimet, unë jam kryeministër i sukseseve

Kryeministri, Sali Berisha, ka gjetur sërish rastin dje gjatë mbledhjes së qeverisë për të sulmuar mediat. Ai tha se shtypi të vazhdojë të shkruajë, por ai mbetet kryeministri i sukseseve. “Qeveria do t’i qëndrojë besnike programit të shpallur dhe unë, kryeministër i fjalës dhe premtimeve të mbajtura. Sado të përpiqen t’i mashtrojnë shqiptarët me headline, tituj e nëntituj, atyre çdo ditë e më shumë i rritet besimi te kryeministri i tyre, sepse shohin çdo ditë sesi ai dhe qeveria e tij mbajnë një e nga një zotimet. Ndaj të vazhdojmë zbatimin e programit.” Berisha bëri të ditur gjatë mbledhjes së Këshillit të Ministrave, fillimin e zbatimit të projektit për ndërtimin e 1500 kilometrave rrugë dytësore, me një fond prej 420 milionë dollarësh. “Fondi i arritur është rreth 420 milionë dollarë. Projektet janë paraqitur dhe është përzgjedhur Fondi Shqiptar i Zhvillimit si institucioni i ngarkuar për prokurimin edhe zbatimin e këtyre projekteve, të cilat shtrihen në mbarë territorin e vendit nga qarku i Vlorës, respektivisht Saranda deri në qarkun e Kukësit, në veri të vendit”, - tha kryeministri. Kryeministri tha se prioritet do t’i jepet rrugëve më të rëndësishme të zonave bujqësore dhe turistike, që janë dhe dy kriteret kryesore në përzgjedhjen e rrugëve që do t’i nënshtrohen ndërtimit dhe rikonstruksionit.

“Përparësi do t’i jepet rrugëve më të rëndësishme bujqësore dhe turistike. Në rrethet si Korça, qarku i Beratit apo qarqe të tjera, sigurisht përparësi kanë pasur zonat bujqësore. Në rrethe të tjera përparësi i është dhënë zonave turistike. Këto të dyja kanë qenë kriteret kryesore të përzgjedhjes të rrugëve që fillojnë dhe deri në fund të qershorit që të gjitha tenderohen.” “Me ketë akt, ne bëjmë një hap tjetër shumë të madh drejt Shqipërisë evropiane, me një rrjet rrugor modern. Ne nuk ndërtojmë e rindërtojmë vetëm rrjetin e rrugëve kombëtare, por ne ndërtojmë dhe rindërtojmë edhe rrjetin e rrugëve dytësore, pavarësisht se ato shtrohen në zona rurale apo qytete. Në këtë mënyrë, ne i shkëpusim qytetet tona nga pluhuri dhe balta, i japim një nxitje të madhe tregut në zonat rurale, si dhe inkurajojmë turizmin, për të cilin Shqipëria ka shumë nevojë. Nuk ka vend më të pasur në vende turistike se Shqipëria dhe duhet t’u japim mundësi qytetarëve tanë dhe të huaj të arrijnë të frekuentojnë të gjitha zonat turistike. Ne duhet t’i japim përparësi të madhe infrastrukturës së zonave turistike dhe bujqësore të vendit”, - u shpreh kryeministri.

Qeveria miratoi edhe një shtesë fondi në buxhetin e Ministrisë së Brendshme për ndërtimin e rrugës Drimadhë-Sopik, në qarkun e Gjirokastrës.