Berisha Rama e ka Topin ne xhep
Opozita nuk ka artikuluar ende në mënyrë të qartë se në paketën eventuale të ndryshimeve kushtetuese do të përfshijë edhe mënyrën e zgjedhjes së presidentit.
Por, sido që të ndodhë, kryeministri Berisha ka qenë më i qartë se asnjëherë tjetër për konsideratën e tij për presidentin Topi, i zgjedhur 4 vjet më parë me votat e demokratëve.
Por fishekzjarret janë shuar prej kohësh dhe tani Bamir Topi cilësohet si presidenti që me votën e tij për Edi Ramën dhe Partinë Socialiste, ka faktuar se i përket opozitës.
Këtë konsideratë kryeministri e shprehu kur u pyet nëse pjesë e ofertës së bashkëpunimit me opozitën mund të jetë edhe zgjedhja e presidentit konsensual korrikun e ardhshëm.
“Oferta ime është zbatimi dhe respektimi i Kushtetutës. Ju e shihni se zoti Rama e pati Presidentin. Presidenti votoi për të, kjo u faktua me votë. Unë dua të theksoj këtu se janë jo të paktë ata që më thonë, a ndiheni i tradhtuar nga ky veprim? Absolutisht, nuk ndihem aspak i tradhtuar, sepse duhet të jeni të bindur se thelbi i përpjekjeve të jetës sime ka qenë që njerëzit të votojnë të lirë. Këtë ideal nuk mund të ma errësojë as edhe një interes tjetër i ngushtë. Zoti Rama e pati Presidentin me mish e me shpirt, sepse ai që të jep votën të jep shpirtin e tij politik, ai firmos për ty, me vullnetin e tij politik. A mund të më thoni; kush duhet të prevalojë, të mbizotërojë: flirtet, prapashpinëzat, apo Kushtetuta. Sigurisht do të mbizotërojë Kushtetuta”, ka deklaruar Berisha.
Kushtetuta, sipas ndryshimeve konsensuale të realizuara 3 vjet më parë sipas marrëveshjes mes Sali Berishës dhe Edi Ramës, parashikon shumicën e cilësuar prej 84 votash vetëm për tre raundet e para dhe më pas ai mund të zgjidhet me 71 vota. Mesa duket, këtë formulim demokratët nuk do të jenë të gatshëm ta ndryshojnë.
“Unë u përgjigja se Presidenti i Republikës do të zgjidhet tërësisht në përputhje me Kushtetutën. Dhe kjo nuk është absolutisht në interes tim apo në interes të qeverisë, por është tërësisht në interesin e rendit kushtetues dhe të qytetarëve. Të kërkosh ndryshime kushtetuese sepse do ta fusësh presidentin gjysmë në xhep, ndërkohë që e ke në xhep plotësisht dhe nuk të dha asgjë, më thoni ju lutem, sa racionale është kjo? Gjërat duhet të kenë thelbin e arsyes. Çfarë i dha atij Presidenti? 140 mijë vota më pak, me gjithë votën e tij pro”, ka pohuar Berisha.