Berisha, fjalim në ditën e parë të Kongresit të 20-të të PPE

Kryeministri Berisha do të marrë pjesë në punimet dyditore të Kongresit të XX të PPE, i cili do mbahet në Marsejë. Ai do të mbajë fjalimin e tij në ditën e parë, së bashku me politikanët e rëndësishëm të së djathtës evropiane; Sarkozi, Merkel, Barroso dhe kryeministri i ri spanjoll Rajoy

Kryeministri Berisha u nis dje për një vizitë në Francë.
Sipas njoftimit të zyrës për shtyp të Kryeministrisë, mësohet se gjatë kësaj vizite, Kryeministri do të marrë pjesë në punimet e Kongresit e XX të PPE-së, i cili do të zhvillohet në Marsejë, në datat 7 dhe 8 dhjetor, si dhe do të takojë më datë 9 dhjetor Kryeministrin francez Francoise Fillon.
Në këtë kongres, do të marrin pjesë drejtues të shteteve dhe qeverive, si Nikolas Sarkozi (Francë), Francois Fillon (Francë), Angela Merkel (Gjermani), Donald Tusk (Poloni - Këshilli i BE Presidenca), Traian Bashesku (Rumani), Emil Bok (Rumani), Viktor Orban (Hungari), Fredrik Reinfeldt (Suedi), Enda Kenny (Irlandë), Bojko Borisov (Bullgari), Lawrence Gonzi (Malta), Jyrki Katainen (Finlandë), dhe Pedro Passos Coelho (Portugali), etj.
Gjithashtu, të pranishëm do të jenë edhe Presidenti i Komisionit Evropian Hose Manuel Barroso, Presidenti i Parlamentit Evropian Buzek Jerzy, dhe Presidenti i Grupit EPP në Parlamentin Evropian Joseph Daul.
Përveç Sekretari i UMP i Përgjithshëm Jean-François Cope (Francë), të pranishëm do të jenë edhe liderët e partive anëtare të PPE, Antonis Samaras (Greqi), Silvio Berlusconi (Itali), Nikos Anastasiades (Qipro), Lars Barfoed (Danimarkë), dhe Erna Solberg (Norvegjia), etj.
Kongresi XX i PPE-së do të diskutojë mbi situatën ekonomike në Evropë dhe çështjen e një forcimi politik dhe integrimi të mëtejshëm ekonomik, fiskal e social, si një përgjigje ndaj krizës ekonomike në eurozonë. 
Kryeministri do t’i drejtohet me një fjalë Kongresit në ditën e parë të punimeve të tij.
Gjithashtu, Partitë Popullore Evropiane dhe Grupi i saj parlamentar në Parlamentin Evropian, do të zhvillojnë një Seminar të përbashkët me temë; “Bashkimin Evropian dhe zgjimi demokratik në Mesdhe: Mbështetja e pranverës arabe, duke shtuar ndihmën për demokracitë e reja”.
Kryeministri Berisha, gjatë ditës se dytë të Kongresit, do të marrë pjesë në Samitin e kryetarëve të shteteve dhe kryeministrave të PPE-së, që i paraprin mbledhjes së Këshillit Evropian. Më datën 9 dhjetor, Kryeministri Berisha do të takojë në Paris Kryeministrin e Francës Francoise Fillon, me të cilin pritet të diskutojë në lidhje me zhvillimin dhe fuqizimin e marrëdhënieve dypalëshe dhe në lidhje me procesin e integrimit evropian. Gjatë kësaj vizite, ai gjithashtu do të takojë ministrin francez për Energjetikën, Eric Besson, si dhe do të vizitojë ekspozitën “Faqet e arta të fotografisë shqiptare”, e çelur në Paris, në Shtëpinë Evropiane të Fotografisë.