Bisedimet Serbi-Kosovë mund të nisin në shkurt
Pas formimit të qeverisë në Prishtinë, pritet të nisin bisedimet. Problem, dyjëzimi BE-SHBA
Bisedimet ndërmjet Prishtinës dhe Beogradit mund të nisin në pjesën e dytë të muajit shkurt të vitit të ardhshëm, pas krijimit të qeverisë së re të Kosovës, vlerësojnë përfaqësuesit e Parlamentit Evropian dhe analistët në Beograd. Këta të fundit thonë se, në mungesë të një qëndrimi të qartë të BE-së dhe Shteteve të Bashkuara ndaj këtyre bisedimeve, pala serbe dhe ajo kosovare do të gjejnë arsyetime për ta shtyrë këtë proces.
Vendimi i Komisionit Qendror të Zgjedhjeve në Kosovë që më 9 janar të vitit të ardhshëm të përsëriten zgjedhjet parlamentare në Drenas, Skenderaj, Deçan, në një qendër votimi në Lipjan dhe një tjetër në Malishevë, sipas tyre, është pjesë e nevojshme e procesit për krijimin e një qeverie legjitime.
Deputetja e Parlamentit Evropian, Doris Pack, thotë për radion “Evropa e Lirë” se pas përsëritjes së zgjedhjeve në disa komuna, partitë politike në Kosovë do të kenë shumë opsione për të formuar qeverinë e ardhshme të vendit.
“Fakt është që njëra parti ka shumicën dhe ata po përpiqen të formojnë qeverinë, por nuk mund të shkojnë vetëm, andaj ju duhen disa partnerë të koalicionit, të cilët duhet dhe mund t’i gjejnë. Nëse ata nuk mund t’i gjejnë, ekziston një parti tjetër që mund ta bëjë një koalicion të gjerë me disa parti. Andaj mendoj se ka shumë mundësi dhe le të zbatohen ato”, - shprehet Pack.
Muaji shkurt i vitit të ardhshëm dhe themelimi i qeverisë së ardhshme të Kosovës, vlerësohen si momente të rëndësishme për dialogun Prishtinë-Beograd edhe nga analisti serb Dushan Janjic.
Ai thotë se takimi në këtë periudhë i udhëheqësve shtetërorë të Kosovës e Serbisë që, sipas tij, do të jenë presidenti serb, Boris Tadic, dhe kryeministri Hashim Thaçi, do t’i hapë rrugë nisjes së dialogut për të ashtuquajturat çështje teknike ndërmjet dy palëve.
“Kjo është ajo që pres, që në pjesën e dytë të shkurtit të nisë takimi ndërmjet Tadicit dhe Thaçit - të them, takimi i elefantëve. Pas kësaj, marsi dhe muajt e tjerë do të jenë nën shenjën e dialogut teknik”, - thotë Janjic.
Në kuadër të faktorëve të tjerë, që, sipas Janjicit, mund ta zgjasin procesin e bisedimeve ndërmjet Prishtinës e Beogradit, hyn raporti i fundit i raportuesit të Këshillit të Evropës, Dick Marty, dhe zgjedhjet e ardhshme parlamentare në Serbi, të cilat pritet të mbahen kah fundi i vitit të ardhshëm.
Janjic flet për mungesën e vullnetit politik në Kosovë e Serbi, për të zhvilluar bisedimet ndërmjet vete dhe thekson se as Brukseli zyrtar nuk ka një qëndrim të qartë dhe koordinim të nevojshëm me Shtetet e Bashkuara për këtë proces.
Dyshime në lidhje me qëndrimin e Bashkimit Evropian karshi bisedimeve ndërmjet Prishtinës e Beogradit shfaq edhe eurodeputetja, Doris Pack, e cila thotë se “Ashton dhe njerëzit përreth saj do të duhej të ishin më shumë të angazhuar në Ballkan, veçanërisht në këtë rajon të vështirë - që nënkupton Kosovën, Serbinë dhe Bosnjë-Hercegovinën”.