Bisedimet për armëpushim, Hamasi refuzon kushtet e reja të Izraelit
Hamasi ka bërë të ditur sot se refuzon kushtet e reja izraelite të paraqitura në bisedimet e armëpushimit në Gazë, duke hedhur dyshime të mëtejshme mbi shanset e një përparimi në përpjekjen e fundit të mbështetur nga SHBA për t’i dhënë fund luftës 10-mujore.
Bisedimet disamujore pa ndërprerje kanë dështuar në arritjen e një marrëveshjeje për t’i dhënë fund luftës në Gazë dhe për të liruar pengjet e mbetura.
Pikat kryesore të pengesave në bisedimet e vazhdueshme të ndërmjetësuara nga Shtetet e Bashkuara, Egjipti dhe Katari përfshijnë një prani izraelite në të ashtuquajturin Korridori Filadelfi, një shtrirje e ngushtë 14.5 km e gjatë përgjatë kufirit jugor të Gazës me Egjiptin.
Hamasi tha se Izraeli është tërhequr nga angazhimi për të lëvizur trupat nga Korridori dhe për të vendosur kushte të tjera të reja, duke përfshirë kontrollin e palestinezëve të zhvendosur ndërsa ata kthehen në veriun më të populluar të enklavës kur të fillojë armëpushimi.
“Ne nuk do të pranojmë diskutime për tërheqje nga ajo që ramë dakord më 2 korrik ose kushte të reja,” tha zyrtari i Hamasit, Osama Hamdan, për televizionin Al-Aqsa të grupit të dielën.
Të paktën 40,405 palestinezë janë vrarë dhe 93,468 të tjerë janë plagosur në ofensivën ushtarake të Izraelit në Gaza që nga 7 tetori, tha Ministria e Shëndetësisë në Gaza. Në 24 orët e fundit, 71 u vranë dhe 112 u plagosën.
/rtsh.al/