Biznesi kundër kryeministrit për cilësimin e punës së zezë, vepër penale

Biznesi prodhues kundërshtoi dje shumë ashpër nismën e fundit të qeverisë shqiptare për të cilësuar si vepër penale punën e zezë. Konfindustria tha se mënyra më e mirë për të bërë të mundur realisht dhe pa kosto ekonomike zhvillimin afatgjatë të vendit, është para së gjithash nxitja dhe mbështetja e nismave sipërmarrëse, dhe jo goditja psikologjike e tyre me masa të skajshme. Ky grupim i rëndësishëm i biznesit në vend, që përfaqëson bizneset prodhuese, tha se është e habitshme se si është arritur në këtë masë të qeverisë. Sipas tyre nuk mbështetet askund argumenti që një marrëveshje kontraktore ndërmjet palëve, e arritur me vullnet të plotë, të konsiderohet me ligj si vepër penale për njërën palë.

Nuk ka asnjë vend në botë, pavarësisht nivelit të informalitetit në ekonomi, që të ketë cilësuar vepër penale punën e zezë. Puna e zezë gjithkund është gjykuar si një kundravajtje dhe kaq. Konfindustria tha dje gjithashtu se nisma për trajtimin e punës së zezë si vepër penale ndërmerret edhe në kushte të jashtëzakonshme pasi vendi është në kushtet e një papunësie mjaft të lartë, informaliteti është mjaft i zgjeruar dhe sistemi i drejtësisë është i dështuar. Konfindustria tha se edhe autoriteti i shtetit nuk ushtrohet në të njejtën shkallë e menyrë në gjithë hapësirën gjeografike të vendit dhe kjo është një tjetër arsye pse qeveria nuk duhet assesi ta cilësojë punën e zezë vepër penale. Konfindustria iu kërkoi dje vendimmarrësve politikë që për të arritur formalizimin e tregut të punës dhe ekonomisë në përgjithësi, të ulë taksën e punës dhe të rrisë shkallën e dënimeve për subjektet, por jo dënime penale. Më e rëndësishme, tha Konfindustria, është trajtimi i të gjitha bizneseve njëlloj dhe veprimi i ligjit në të gjithë vendin duhet të jetë i njëjtë. Dy ditë më parë kryeministri Berisha tha se punësimi në të zezë i punonjësve nga bizneset do të cilësohej vepër penale dhe të gjitha bizneset do të dërgoheshin në prokurori për këtë vepër. Ai i kërkoi ministrit të Drejtësisë të hartonte projektligjin, i cili më pas do të kalojë në qeveri dhe në parlament. Numri i të punësuarve në sektorin privat, jo bujqësor, në vend llogaritet në rreth 450 mijë syresh dhe nga këta të regjistruar janë 300 mijë. Më shumë se 40 për qind e të punësuarve në sektorin privat janë të paregjistruar dhe duket se kjo shifër e jashtëzakonshme pas tre vjetësh qeverisjeje ka detyruar kryeministrin të ndërmarrë masa ekstreme për ta mpakur këtë shifër.