Bogdanoviç: Nuk i heqim institucionet nga veriu

I ashtuquajturi ministër për Kosovën, Goran Bogdanovic, ka thënë se "me tërheqjen e institucioneve serbe nga veriu dhe nga pjesët e tjera të Kosovës, do të ndodhë spastrimi etnik i popullit”. “Aty ku ekzistojnë institucionet e shtetit serb, aty serbët kanë mbijetuar”, ka shtuar ai.

Bogdanoviç thotë se raporti i Qeverisë së Serbisë për Kosovën “paraqet pasqyrë reale të ngjarjeve dhe të gjendjes në terren”. Ndërsa, i pyetur se disa parti politike serbe ankohen se pse në atë raport nuk janë përmendur planet dhe veprimet e ardhshme të Serbisë, Bogdanovic ka thënë se “do të ishte joserioze dhe papërgjegjësi që publikisht t`i shpalosim hapat dhe planet konkrete.

“Kështu do t`i japim përparësi palës tjetër”, ka thënë ai për Vecernje Novosti, duke shtuar se pret që së shpejti të rivendoset dialogu me Prishtinën.

"Taktikat e vonesës nga Prishtina kanë për qëllim të ngadalësojnë rrugën evropiane. Por, ata duhet të kuptojnë se në qoftë se Serbia nuk përparon, as ata nuk do ta kenë më mirë” ka theksuar Bogdanovic.