Brahimi kërkon rol aktiv të Kinës

I dërguari i Kombeve të Bashkuara dhe Ligës Arabe për Sirinë, Lakhdar Brahimi, i ka bërë thirrje Kinës që të luajë një rol më aktiv dhe të bëjë përpjekje në dhënien fund të dhunës në këtë vend të Lindjes së Mesme.

Këtë thirrje Brahimi e bëri pas takimit me Ministrin e Jashtëm Kinez, Yang Jiechi, në Pekin.

Takimi u mbajt disa ditë pas prishjes së armëpushimit ndërmjet qeverisë siriane dhe forcave të armatosura kryengritëse.

Në Pekin, Brahimi qëndroi pas bisedimeve të zhvilluara në Moskë me ministrin e Jashtëm rus, Sergei Lavrov.

Pas takimit me Lavrov, Brahimi kishte thënë se kriza në Siri është duke u përkeqësuar.

Rusia dhe Kina u kanë vënë veto rezolutave të Këshillit të Sigurimit të Kombeve të Bashkuara, që dënonin dhunën e presidentit sirian, Bashar al-Assad.

Revolta popullore kundër regjimit të Assadit ka nisur qysh në mars të vitit të kaluar. Aktivistët thonë se mbi 35.000 njerëz kanë humbur jetën në trazira.