Brokaj: Meidani do takoje Ramen para vitit te ri
Kane vijuar me intensitet me te ulet takimet mes te urteve te dy partive te majta opozitare, perkatesisht Partise Socialiste dhe Levizjes Socialiste per Integrim. Ne perpjekje per te qetesuar "gjakrat" mes dy krereve te ketyre partive, Rama dhe Meta, duket se misioni nuk eshte aq i lehte sa duket. Aq me teper qe pas miratimit te ndryshimit te Kodit Zgjedhor, vetem ne dy nenet te cilat kishte kontestuar Presidenti i Republikes, Bamir Topi, duket se ky mision eshte veshtiresuar akoma me shume. Por, Brokaj, Pellumbi, Meidani dhe Agolli nuk pritet te heqin dore nga keto perpjekje negociuese brenda dy partive qe kater vjet me pare ishin ne nje. Keshtu pritet qe ish-presidenti Meidani, aktualisht anetar i Asamblese Kombetare te partise Socialiste te zhvilloje nje takim me kryetarin socialist Rama perpara vitit te ri, per te paraqitur "formulen" e bashkimit opozitar mes Partise Socialiste dhe Levizjes Socialiste per Integrim, apo me sakte, takimin dhe qetesimin e situates dhe sheshimin e kontradiktave me Meten. "Meidani do takoje Ramen para vitit te ri per ti bere te ditur gjithe diskutimet, kerkesat per nje bashkepunim PS-LSI. Nuk ka pasur negociata, vetem takime", ka qene deklarata e djeshme e nenkryetarit te LSI, Sabit Brokaj per gazeten "Koha Jone". Sipas tij, ende ka pune ne kete drejtim. Per Brokajn, ajo qe Rama duhet te kuptoje eshte se asnje subjekt politik nuk mund te fitoje i vetem ne zgjedhje pa pasur mbeshtetjen e nje force tjeter. Nderkaq, pergjigja e Rames nese eshte ose jo i interesuar per te dialoguar me Meten do te vije nepermjet mandatimit te Meidanit, nje prej negociatoreve te propozuar nga vete Meta. Kur veteranet e politikes se majte kane caktuar ish presidentin Rexhep Mejdani si kryenegociatorin e tyre, ky i fundit ende nuk eshte mandatuar nga kreu i selise roze Rama, per te rivendosur dialogun me LSI. Ne pritje qe kyesocialisti te shprehe vullnetin e tij per rrugen qe do te marre marredhenia mes partive opozitare, negociatori zyrtar i Ilir Metes, Sabit Brokaj, ka deklaruar per median se nje nder kushtet qe duhet te plotesohen eshte perfshirja e amendamenteve te LSI per ndryshimet ne Kodin Zgjedhor. Perpjekje e cila pritet te mbetet ne heshtje nga ana e kreut te PS, pasi tashme ndryshimi eshte kaluar. A.G