Bruna Mersini betohet si kryebashkiake e Vlorës

Në teatrin “Petro Marko” u zhvillua ceremonia e betimit të Bruna Mersinit si Kryetare e Bashkisë së Vlorës. Pjesëmarrës ishin autoritete të pushtetit vendor dhe deputetë të PS, ndërsa opozita nuk ishte e pranishme.

Ceremoninë e udhëhoqi kryetarja e Këshillit Bashkiak, Elpiniqi Mërkuri. Ajo lexoi formulën e betimit, e cila e angazhon kryebashkiaken të udhëheqë me ndershmëri dhe përkushtim ndaj interesave të qytetarëve të Vlorës.

Kryebashkiakja e re shfaqi emocionet dhe krenarinë e saj si gruaja e parë në këtë post.

“Është mision, është përgjegjësi dhe një falënderim për të gjithë qytetarët e Vlorës, për ata që për vite kanë vlerësuar vizionin e Edi Ramës, dashurinë për qytetin. Jam besimplotë, sepse e mendoj punën të lehtë, pasi në këtë qytet ka projekte dhe vizione të një vlonjati që me qeverisjen e tij e transformoi Vlorën në një stad të ri zhvillimi,” tha Mersini.

Pas ceremonisë, zonja Mersini u prit nga administrata e bashkisë, duke marrë detyrën, pas dy muajsh që udhëhoqi Elis Halili, nënkryetar i komanduar.

RTSH