Bylykbashi-Bulku, çështje orësh

Dorian Bylykbashi është vetëm një hap larg transferimit te Dinamo. Burime të sigurta pranë tij dhe drejtuesve të klubit blu, konfirmuan se kanë nisur bisedimet mes palëve.

Fantazisti i njohur elbasanas aktualisht është pa skuadër dhe mbetet në pritje të ofertave. Nga sa mësohet, interesimi i kampionëve për të pasur në ekip Bylykbashin, e ka tunduar lojtarin. Projekti i klubit blu është për afrimin e futbollistëve që kanë qenë dhe janë pjesë e Kombëtares. Më konkretisht, dje përfaqësuesit e Dinamos kanë hedhur hapin e parë për të konkretizuar marrëveshjen me mesfushorin. Ky i fundit, pasi është njohur me ofertën, u ka kërkuar kohë drejtuesve të Dinamos. Por Bylykbashi nuk pritet të jetë goditja e vetme e mekatos së Dinamos. Kjo, pasi orët e fundit në listën e Dinamos është edhe emri i mesfushorit të Kombëtares, Ervin Bulku.

Burime pranë lojtarit janë shprehur se tratativat për një kalim të mundshëm te Dinamo po ecin mirë dhe firma në kontratë është vetëm çështje orësh.