Cana i gatshëm të luajë në mbrojtje

Kapiteni i Sunderlandit, mesfushori shqiptar Lorik Cana, ka deklaruar se ai është i gatshëm të luajë edhe në qendër të mbrojtjes për të mbuluar të dëmtuarit, nëse këtë e kërkon trajneri Steve Bruce. Bruce ka mbetur me vetëm disa mbrojtës të gatshëm për lojë për ndeshjen e të shtunës kundër Portsmouth, me Anton Ferdinand dhe John Mensah të dy të dëmtuar krahas shumë të tjerëve. Por Cana thotë se është i gatshëm të luajë në cilindo pozicion dhe të japë maksimumin, nëse këtë e kërkon trajneri.
"Sigurisht se dua të luaj në mbrojtje kundër Portsmoth. Gjëja më e rëndësishme është ekipi, prandaj nëse duhet të luaj në këtë pozitë atëherë do të jap gjithçka që mundem", ka thënë Cana për faqen zyrtare të klubit.
"Ne kemi shumë lojtarë të dëmtuar dhe të pezulluar që do të jetë problem për ne, prandaj është e rëndësishme që ata të cilët luajnë të japim më të mirën nga vetja".
"Për mua nuk është problem, kam përvojë në këtë pozitë, veçanërisht me ekipin tim kombëtar. Nëse duhet të luaj në mbrojtje për të ndihmuar ekipin tim, është detyrë e imja ta bëj këtë. Por vendimi nuk është detyrë e jona, trajneri vendos gjithçka", ka shtuar mesfushori i kombëtares shqiptare.