Carney përballet me një provë vendimtare politike pas tërheqjes nga marrëveshja tregtare me SHBA-në

Vendimi i Kryeministrit të Kanadasë, Mark Carney, për t’u tërhequr nga bisedimet tregtare me Presidentin Donald Trump dhe për t’u hakmarrë me tarifa simetrike, shënon hyrjen e dy aleatëve historikë në një territor të panjohur dhe përfaqëson sprovën më të madhe politike të mandatit të tij.

Carney u shndërrua në një nga udhëheqësit e parë botërorë që braktisi tryezën e negociatave me Shtëpinë e Bardhë, pasi akuzoi Uashingtonin se “kërkoi shumë dhe ofroi shumë pak” përmes ndryshimeve të minutës së fundit. I pyetur nga gazetarët nëse të dyja vendet ndodhen tashmë në një luftë të hapur tregtare, kryeministri kanadez u përgjigj prerazi:

“Je në luftë kur sulmohesh — ne u sulmuam. Ndërpresim këtë hap të bindur se kjo është në interesin më të mirë të Kanadasë.”

Në fjalimin e tij drejtuar kombit, i cili u mbajt pjesërisht edhe në gjuhën frëngjisht, Carney nënvizoi se mosmarrëveshja tregtare nuk ishte zgjedhje e Otavës, duke deklaruar se “Kanadaja është e fortë, Kanadaja është gati, Kanadaja është e bashkuar”. Megjithatë, vendimi pritet të sjellë sprova ekonomike për të dyja anët e kufirit, në një kohë kur Kanadaja dërgon rreth 70% të eksporteve të saj në SHBA.

Vendimi i Carney-t ka marrë mbështetje nga opozita politike dhe drejtuesit e provincave kryesore. Udhëheqësi i opozitës konservatore, Pierre Poilievre, dhe Kryeministri i Ontarios, Doug Ford, mbështetën qëndrimin e fortë ndaj Uashingtonit, duke theksuar se Kanadaja nuk mund të pranojë tarifa të njëanshme që mund të deindustrializojnë vendin.

/rtsh.al/