Çelet java e kulturës japoneze, artistja Maruyama Yuri, performon live artin e Ikebanës

Aktivitete të shumta kulturore dhe artistike do të krijojnë një atmosferë tërësisht japoneze me rastin e çeljes së Javës së Kulturës të këtij vendi. Këtë javë do të prezantohen një sërë elementësh nga kultura Japoneze, ku mund të përmendim: ceremoninë e çajit, në të cilën do të demostrohet sesi bëhet çaji në Japoni, shfaqja e ngjalave, ku disa shefa japonezë do demonstrojnë sesi gatuhen ngjalat në një mënyrë speciale japoneze, kupa e Ambasadorit, që do të jepet për federatën e karatesë dhe xhudës dhe në fund do të mbahet një koncert klasik.

“Këtë javë kulture ne finalizojmë 100 vjetorin e marrëdhënieve midis Japonisë dhe Shqipërisë. Për këtë arsye kemi sjellë javën e kulturës në Shqipëri, për t’i dhënë një tonalitet të këndshëm, marrëdhënies midis dy vendeve tona. Falenderoj shumë Qeverinë shqiptare që ka mbështetur Javën e Kulturës Japoneze”, tha ambasadori japonez në vendin tonë.

Ndërkohë, në çeljen e Javës së Kulturës Japoneze u mbajt ceremonia e luleve Ikebana, ku një artiste japoneze performoi live traditën shekullore të rregullimit të luleve.

Javët Ndërkombëtare të Kulturës, me moton “Shqipëria mikpret botën”, është një nismë e Qeverisë shqiptare ku marrin pjesë 17 vende të ndryshme të botës.

/rtsh/