Çfarë do të prodhojë 22 dhjetori? Shkurti: Për mua asgjë, por minimalisht deputetët të sjellin në shesh të dashurat dhe gratë

Partia Demokratike ka thirrur një protestë kombëtare në datën 22 dhjetor, por çfarë do të sjellë kjo protestë? Kjo ishte pyetja që u diskutua në pjesën e dytë të emisionit “Quo Vadis” të moderatores Pranvera Borakaj në Vizion Plus.

I ftuar në studio, gazetari Armir Shkurti tha se kjo protestë nuk do të sjellë asgjë të re, nëse opozita nuk ndryshon mendësi. Me ironi, Shkurti tha se minimalisht deputetët e PD duhet të sjellin në protestë gratë dhe të dashurat.

Pjesë nga biseda:

Borakaj: Në 22 dhjetor opozita ka lajmëruar një protestë kombëtare, çfarë do të sjellë ndryshe?

Shkurti: Mendoj se nuk do të sjellë asgjë. Sepse mënyra sesi erdhëm deri këtu është informale. Domethënë mbaruan zgjedhjet, tha Doktori që u vodhën zgjedhjet, u mor gjithë verës me trenin bullgar, hyri në Parlament, u bënë zgjedhjet e pjesshme që ishin katastrofë. E kur thanë demokratët “nuk jemi dakord”, filluan protestat dhe pastaj i quajti “Foltore”. 22 dhjetori është detyrim-përcaktim.

Borakaj: Çfarë do ta bënte të suksesshme?

Shkurti: Vendosja e emrit, mobilizimi i njerëzve, heqja e kësaj foltoreje që është bërë qesharake, ku dalin njerëzit dhe rrëfejnë problemet e shëndetit mendor. Në protestë, ata deputetët e kanë për detyrë të sjellin gruan ose të dashurën, ose të dyja bashkë. Jo të vijnë ca hallexhinj. Unë e kam thënë, ajo foltore është protestë e demokratëve ndaj PD-së. Por do të doja që 22 dhjetori të ishte ortek.