City nuk do të qëndrojë i pamposhtur

Menaxheri i Manchester Cityt, Roberto Mancini ka insistuar se skuadra e tij lidere në Premierligë nuk do të kalojë sezonin e pamposhtur pavarësisht vazhdimit të serisë pozitive me fitoren 3-1 kundër Newcastles në Eastlands, të shtunën.

Ekipi i Mancinit është i vetmi që ende nuk ka pësuar humbje gjatë këtij sezoni në Premierligë dhe ka bilanc të shkëlqyeshëm prej 11 fitoreve dhe një barazimi nga 12 ndeshjet e para. Starti i furishëm ka zgjuar debat nëse City mund të bëjë atë që kishte bërë skuadra e Arsenalit më 2003-04 që kaloi 38 ndeshje të ligës pa pësuar asnjë humbje.

Megjithatë, strategu italian ka refuzuar të përfshihet në debat. “Shpresoj të vazhdojmë kështu. Por, mendoj se në 26 ndeshjet e mbetura, do të vijë koha kur do të humbim një takim, jam i sigurt për këtë. Jam i kënaqur për futbollistët, kemi luajtur shumë mirë për shkak të tyre dhe jemi përmirësuar shumë. Si futbollistë, si ekip, ne jemi shumë të fuqishëm tani, por sezoni është i gjatë dhe do të kemi momente të vështira. Për këtë sezon, është me rëndësi të vazhdojmë të shënojmë gola dhe të fitojmë ndeshje të njëpasnjëshme”, deklaroi Mancini.