De Biazi, letër kuqezinjve: Keni shansin të shkruani historinë

Trajneri i kombëtares shqiptare, Xhani De Biazi, për të karikuar akoma më shumë kuqezinjtë u ka shkruar këtë letër të hapur futbollistëve: “Sot fillon një rrugë e re. Nuk ka rëndësi se sa kohë kemi punuar së bashku, sepse ajo që SOT ka rëndësi, është që duke filluar që tani, NE do të hedhim bazat për t’u bërë të mëdhenj. Duke filluar që sot, me MUA do të keni vetëm një mundësi: Të dilni në fushë dhe të bëheni të mëdhenj. Në fillim do të jeni një GRUP për të mbrojtur veten TUAJ dhe për të mbrojtur shokët tuaj, një GRUP të cilët çdo kundërshtar duhet t’u ketë frikë. Nuk ka taktikë që të ndihmon, është dëshira për të punuar çdo minutë së bashku. FITORET përgatiten dhe jo gjithmonë fiton më i forti. Ndonjëherë fiton ai që ka më shumë dëshirë, kush është më i përgatitur në një moment të caktuar, kush niset i pari, kush është më i vëmendshëm në çdo detaj. Nëse do të arrijmë këtë në sytë tuaj, kundërshtarët do të shohin një dritë që nuk është gjë tjetër, por vendosmëria JUAJ për të arritur fitoren. Dhe nëse në çdo moment do të jeni të gatshëm për të LUFTUAR, PËR TË VUAJTUR, PËR TË DERDHUR LOT PËR BLUZËN QË mbani veshur për të ndihmuar shokun TUAJ, nuk do të jeni inferior ndaj askujt. UNË KAM BESIM TEK JU. Mund të jeni të parët që mund të kualifikoheni në një Botëror në historinë e këtij KOMBI, të KOMBIT TUAJ, të KOMBIT të baballarëve dhe nënave TUAJ, një KOMB të cilin edhe unë kam filluar ta ndjejë pjesë timen. Mund të jeni të parët që arrini një objektiv kaq të rëndësishëm për Shqipërinë. Dhe kur një ditë të ktheheni në shtëpi, do të jeni të vlerësuar. Përgjithmonë do të flasin për ju dhe për atë që ju keni bërë. Jeni të gjithë të rritur, bëni punën më të bukur në botë dhe ka ardhur momenti që të kapni çdo çast që jeta ju ofron. Dilni në fushë dhe filloni. UNË KAM BESIM DHE JAM ATY ME JU.” (e.i/balkanweb)