Dhuna ndëretnike në Sudan, shkon në 3 mijë numri i të vrarëve

Mbi 3 mijë persona janë vrarë brenda pak ditësh si pasojë e dhunës së ashpër ndëretnike të ushtruar javën e kaluar në shtetin Jonlei, në Sudanin Jugor.

Bëhet fjalë për një bilanc që deri tani nuk është konfirmuar nga burime të tjera, edhe pse Organizata e Kombeve të Bashkuara flet për disa qindra viktima.

Javën e kaluar, rreth 6 mijë të rinj të armatosur, anëtarë të tribusë Lu Nuer, kryen një ekspeditë në Pibor dhe rrethina kundër anëtarëve të tribusë Murle, të akuzuar për vjedhje të bagëtisë.

Në fund të vitit të kaluar, Organizata e Kombeve të Bashkuara vendosi të dërgojë përforcime ushtarake në qytetin e Piborit, pikërisht për shkak të përshkallëzimit të frikshëm të sulmeve ndëretnike.