Drews: Asnjë kompromis në dëm të lëvizjes së lirë

KFOR është i vendosur të garantojë lëvizje të lirë në çdo cep të Kosovës dhe zero tolerancë ndaj çdo aksioni të dhunshëm kundër organizatave ndërkombëtare.
 

Këtë e ka konfirmuar të enjten komandanti i KFOR-it, Erhard Drews, gjatë një vizite që e ka bërë në komunën e Gjakovës.
 

“Nuk presim përkeqësim të situatës, por përkundrazi ndoshta përmirësim të saj. Presim një zgjidhje politike mes të qeverisë së Beogradit dhe asaj të Prishtinës, sigurisht me mbështetjen e ndërkombëtarëve, mirëpo në anën tjetër presim edhe përmirësime të raporteve të qeverisë së Kosovës dhe qytetarëve në pjesën veriore”, ka thënë Drews.
 

Duke folur për aksionin e fundit të KFOR-it, për largimin e barrikadave serbe, gjenerali Drews ka thënë se lëvizja e lirë mbetet prioriteti kryesor i misionit paqeruajtës, prandaj në këtë drejtim nuk do të ketë kompromis me askënd.