Duka e Kuzhe, të shtunën në Varshavë për Euro 2012

Shorti
Më 7 shkurt, Kombëtarja do të njohë kundërshtarët e eliminatoreve

Federata Shqiptare e Futbollit ka përzgjedhur delegacionin që do të udhëtojë drejt kryeqytetit të Polonisë, Varshavë, për shortin ku do të përcaktohen grupet e fazës eliminatore të Euro 2012. Armand Duka, kreu i institucionit që drejton futbollin në vend, përveç trajnerit Josip Kuzhe, do të jetë i shoqëruar edhe nga zv.presidenti Lutfi Nuri dhe sekretari i përgjithshëm, Eduard Prodani. 51 përfaqësueset pjesëmarrëse do të ndahen në nëntë grupe, ku gjashtë do të jenë me nga gjashtë skuadra, ndërsa tri me nga pesë. Shqipëria ndodhet në vazon e pestë, ku renditet e dyta, menjëherë pas Malit të Zi. Rrjedhimisht kuqezinjtë do të kenë katër kundërshtarë më të fortë se vetja në grupin eliminator. Kjo bën që ngjitja një vazo më lart, e cila është edhe objektivi kryesor, të duket një mision mjaft i vështirë. “Kokat e grupeve” janë Spanja, Gjermania, Holanda, Italia, Anglia, Kroacia, Portugalia, Franca dhe Rusia.

#