Elbasan policia rrugore aksion ne rruge

Të paktën shtatë motoçikleta që qarkullonin në qytet pa targa dhe dokumentacionet përkatëse janë bllokuar sot gjatë një aksioni rutinë ndërmarrë nga Shërbimet e Policisë Rrugore në Elbasan. Sipas zëdhënës Valbona Begu, “shërbimet e Policisë rrugore kanë ushtruar gjatë ditës së sotme një aksion të shoqëruar me kontrolle të rrepta në akset kryesore të qytetit, për të ndaluar përdorimin e motoçikletave pa targa si dhe të atyre që i përdorin ato pa kaskën mbrojtëse”.

Sipas Begut, “drejtuesit e këtyre mjeteve, pjesa më e madhe adoleshentë, krahas rrezikut të aksidenteve të mundshme që shkaktojnë në rrugë, janë ndëshkuar dhe me gjoba përsa i përket respektimit të rregullave të qarkullimit rrugor” .

Aksioni i cili ka zgjatur rreth tre orë ka bërë të mundur bllokimin e motoçikletave si dhe vendosjen e dhjetra gjobave për mospërdorim të kaskave mbrojtëse.

Aksioni i policisë rrugore të Elbasanit, sipas Begut, do të vazhdojë me kontrolle të kësaj natyre edhe në tri nënprefektuarat e këtij qarku, pasi sipas statistikave mësohet se pjesa më e madhe e aksidenteve të ndodhura në qark ka ardhur si pasojë e qarkullimit të motoçikletave nga drejtuesit amatorë.