FILIPINE – Të paktën 91 të vdekur, 430 000 të zhvendosur nga tajfuni “Kalmaegi”

MANILA, 5 nëntor /ATSH-DPA/- Numri i të vdekurve nga tajfuni “Kalmaegi” në Filipine është rritur në 91, me 75 të zhdukur dhe mbi 430 000 të zhvendosur, tha sot agjencia kombëtare e fatkeqësive.

Dhjetë persona u raportuan gjithashtu të plagosur në përmbytjet dhe aksidentet e tjera të shkaktuara nga tajfuni “Kalmaegi”, ndërsa sistemi meteorologjik solli shira të rrëmbyeshëm mbi 24 provinca në rajonet kryesore filipinase, Luzon, Visayas dhe Mindanao.

Tajfuni po shoqërohej me erëra maksimale të qëndrueshme prej 130 kilometrash në orë dhe shpërthime të erës deri në 180 kilometra/orë ndërsa po largohej nga bregu perëndimor i Filipineve.

Ai lëvizi në veriperëndim me 25 kilometra/orë dhe parashikohet të largohet nga Filipinet sot në mbrëmje ose nesër ndërsa drejtohet drejt Vietnamit.

Dyzet e nëntë nga viktimat ishin nga provinca e Cebu, e cila u godit rëndë nga përmbytjet e konsiderueshme.

Zyra e Mbrojtjes Civile (OCD) shtoi se vdekjet u shkaktuan nga mbytja, rrëshqitjet e dheut dhe mbeturinat.

Njëmbëdhjetë vdekje, të shkaktuara nga përmbytjet dhe mbeturinat e rëna, u raportuan gjithashtu në rajonin e Ishullit Negros dhe provincat Capiz, Bohol, Leyte dhe Leyte Jugore.

Një total prej 706 549 personash në 24 provinca u prekën nga tajfuni, përfshirë 436 911 që u detyruan të largoheshin nga shtëpitë e tyre.

Më shumë se 30 fluturime u anuluan sot, ndërsa gati 3 000 pasagjerë ishin ende të bllokuar në portet detare.

Zyra e motit tha se një ciklon tjetër tropikal po lëvizte drejt Filipineve dhe pritej të hynte në vend deri të premten në mbrëmje ose të shtunën.

“Depresioni tropikal” pritet të intensifikohet dhe mund të shndërrohet në një super tajfun gjatë fundjavës.

Filipinet goditen mesatarisht nga rreth 20 ciklone tropikale në vit. Një nga stuhitë më të forta që ka goditur ndonjëherë vendin ishte Super Tajfuni “Haiyan” në nëntor 2013, i cili shkaktoi vdekjen e më shumë se 6 300 personave. //a.i/