FOKUS – CNN: Votuesit e Harris më të sigurt se ata të Trump se zgjedhjet po zhvillohen si duhet

UASHINGTON, 6 nëntor /ATSH/ – Dy të tretat e votuesve në zgjedhjet e këtij viti thonë se janë të paktën disi të sigurt se zgjedhjet e këtij viti po zhvillohen në mënyrë të drejtë dhe të saktë, sipas rezultateve fillestare të sondazhit kombëtar të CNN, por pikëpamjet janë thellësisht të polarizuara.

Exit poll-et në SHBA nuk parashikojnë drejtpërdrejt rezultatin e zgjedhjeve, por krijojnë një pasqyrë të opinioneve dhe motivimeve të votuesve.

Afërsisht 9 në 10 votues që mbështesin zëvendëspresidenten, Kamala Harris thonë se janë të sigurt, krahasuar me gjysmën e atyre që mbështesin ish-presidentin, Donald Trump.

Përafërsisht tre të katërtat e votuesve në përgjithësi këtë vit besojnë se demokracia në SHBA është nën kërcënim, me vetëm rreth një të katërtën që e cilësuan atë të sigurt.

Gati 4 në 10 thonë se demokracia është shumë e kërcënuar.

Dhe një shumicë e gjerë e votuesve, rreth 7 në 10, thonë se janë të shqetësuar për dhunën si rezultat i zgjedhjeve.

Sondazhet e CNN për zgjedhjet e përgjithshme të 2024 përfshinë intervista me mijëra votues, si ata që hodhën votën në ditën e zgjedhjeve, ashtu edhe ata që votuan para kohe ose munguan.

Kjo shtrirje i bën ata një mjet të fuqishëm për të kuptuar profilin demografik dhe pikëpamjet politike të votuesve në zgjedhjet e këtij viti.

Dhe gjetjet e tyre përfundimisht do të peshohen kundrejt standardit përfundimtar: vetë rezultatet e zgjedhjeve.

Sondazhet e CNN janë një kombinim i intervistave personale me votuesit e ditës së zgjedhjeve dhe intervistave personale, sondazheve telefonike dhe online që matin pikëpamjet e votuesve të hershëm dhe atyre me postë./  a.jor.