FOKUS – Ministrat e NATO-s diskutojnë për forcimin e mbrojtjes mes kërcënimit rus
BRUKSEL, 3 prill /ATSH-DPA/ – Ministrat e Jashtëm të NATO-s takohen sot në Bruksel për të diskutuar forcimin e aftësive mbrojtëse të aleancës, pasi aleatët evropianë përballen me presion në rritje nga Shtetet e Bashkuara për të rritur shpenzimet dhe për të adresuar kërcënimin që vjen nga Rusia.
Duke folur përpara takimit dyditor, sekretari i përgjithshëm i NATO-s Mark Rutte theksoi se takimi vjen në “një moment veçanërisht vendimtar për sigurinë tonë të përbashkët, me sfida shumë të mëdha që secili prej nesh t’i trajtojë i vetëm”.
Ai vuri në dukje se ndërsa aleatët kishin premtuar tashmë më shumë se 20 miliardë euro në ndihmë të sigurisë për Ukrainën deri në vitin 2025, “kërcënimi me të cilin përballemi nga Rusia mbetet”.
Aleatët e NATO-s kanë qenë të vendosur të paraqesin një front të bashkuar në dritën e pushtimit në shkallë të plotë të Ukrainës nga Rusia, por këto përpjekje janë minuar nga administrata e Presidentit të SHBA-së, Donald Trump në javët e fundit.
Duke kërkuar një marrëveshje të shpejtë paqeje, Uashingtoni ka sugjeruar që Ukrainës mund t’i duhet të heqë dorë nga ambicia e saj për t’u bashkuar me NATO-n dhe për të bërë lëshime territoriale, me Sekretarin e Shtetit të SHBA-së Marco Rubio që pritet t’i bëjë jehonë këtij qëndrimi në takimin e Brukselit.
Ministri i Jashtëm ukrainas Andrii Sybiha, shefja e politikës së jashtme të Bashkimit Evropian Kaja Kallas dhe partnerët e NATO-s Indo-Paqësor pritet të marrin pjesë gjithashtu./ /os/