FOKUS – Rusia godet Ukrainën qendrore dhe perëndimore gjatë natës
KIEV, 10 shtator /ATSH/- Forcat Ajrore të Ukrainës thanë se Rusia qëlloi 415 dronë sulmues dhe mashtrues, si dhe 42 raketa kruiz dhe një raketë balistike mbrëmë, sipas AP.
“Mbrojtja ajrore ukrainase ka interceptuar 386 dronë dhe 27 raketa kruiz”, sipas raportit.
“Të paktën tetë UAV kaluan kufirin shtetëror të Ukrainës në drejtim të Republikës së Polonisë”, thuhet në mesazhin e Forcave Ajrore.
“Dronët rusë plagosën tre persona në rajonin perëndimor Khmelnytskyi të Ukrainës”, shkroi guvernatori Serhii Tiurin në Telegram sot në mëngjes.
“Një person u vra dhe një tjetër u plagos në rajonin Zhytomyr gjatë natës”, shkroi kreu i administratës rajonale Vitalii Bunechko në Telegram, ndërsa shtëpitë dhe bizneset pësuan dëme.
Në rajonin e Vinnytsia, dronët rusë dëmtuan infrastrukturën civile dhe industriale. Gati 30 ndërtesa banimi u dëmtuan dhe një person u plagos.
Në rajonin Cherkasy, disa shtëpi dhe një rrjet elektrik u dëmtuan në sulmin rus.
Ministria Ruse e Mbrojtjes tha në raportin e saj të mëngjesit se kishte shkatërruar 122 dronë ukrainas mbi rajone të ndryshme ruse gjatë natës, duke përfshirë mbi Krimenë e aneksuar ilegalisht dhe zonat e Detit të Zi. //a.i/