FOKUS – Tajlanda dhe Mianmari goditen nga një tërmet i fuqishëm 7,7 ballë
BANGKOK, 28 mars /ATSH/- Një tërmet me magnitudë 7,7 ballë goditi Tajlandën dhe Mianmarin fqinj dje në mesditë – duke shkaktuar shembjen e një ndërtese shumëkatëshe në ndërtim në Bangkok dhe duke detyruar qindra mijëra banorë të evakuohen nga banesat dhe vendet e tyre të punës, sipas AP.
Tërmeti i mesditës u pasua nga një pasgoditje e fortë me magnitudë 6,4 ballë.
“Viktimat e mundshme nga shembja e ndërtesës pranë tregut popullor Chatuchak të Bangkok nuk dihen ende”, tha policia duke shtuar se nuk kishte asnjë informacion të menjëhershëm se sa punonjës ndodheshin në vend në atë kohë.
Një video dramatike e qarkulluar në mediet sociale tregoi ndërtesën shumëkatëshe me një vinç në majë duke u rrëzuar, ndërsa banorët bërtisnin dhe vraponin.
Njerëzit në Bangkok të evakuuar nga ndërtesat e tyre u paralajmëruan të qëndronin jashtë në rast se do të kishte më shumë pasgoditje.
“Shërbimi Gjeologjik i SHBA-së dhe qendra gjermane GFZ për gjeoshkencat thanë se tërmeti ishte i cekët 10 kilometra (6,2 milje), me epiqendër në Mianmar”, sipas raporteve paraprake.
Tingulli i sirenave jehoi në të gjithë Bangkokun qendror dhe automjetet mbushën rrugën, duke lënë të bllokuara disa nga rrugët tashmë të mbipopulluara të qytetit. Sistemi i ngritur i tranzitit të shpejtë dhe metroja u mbyllën.
Bashkia e shpalli qytetin një zonë fatkeqësie për të lehtësuar ndihmën ndërinstitucionale dhe ndihmën emergjente.
“Në Mandalay, qyteti i dytë më i madh i Mianmarit dhe afër epiqendrës, tërmeti dëmtoi një pjesë të ish-pallatit mbretëror dhe ndërtesave”, sipas videove dhe fotove të publikuara.
Ndërsa zona është e prirur ndaj tërmeteve, ajo përgjithësisht është pak e populluar dhe shumica e shtëpive janë struktura të ulëta.
Në rajonin Sagaing në jugperëndim të Mandalay, një urë 90-vjeçare u shemb dhe disa pjesë të autostradës që lidh Mandalay dhe qytetin më të madh të Mianmar, Yangon, u dëmtuan gjithashtu.
Banorët në Yangon u larguan me nxitim nga shtëpitë e tyre kur ra tërmeti. Nuk pati raportime të menjëhershme për të plagosur apo vdekje.
Në kryeqytetin Naypyitaw, tërmeti dëmtoi faltoret fetare.
“Në verilindje, tërmeti u ndje në provincat Yunnan dhe Sichuan në Kinë dhe shkaktoi dëme në shtëpi dhe të plagosur në qytetin Ruili në kufirin me Mianmarin”, sipas raporteve të mediave kineze.
“Lëkundjet në Mangshi, një qytet kinez rreth 100 kilometra (60 milje) në verilindje të Ruili, ishin aq të forta sa njerëzit nuk mund të qëndronin, sipas “The Paper”. //a.i/