Fejzullahu synon tituj me Djurgardenin

Erton Fejzullahu e ka nisur furishëm eksperiencën në Djurgarden. Ai realizoi tri gola në fundjavë, në fitoren 3:1 ndaj Helsingborgut. Sulmuesi kosovar e ka gjetur rehatinë në ekipin suedez dhe thotë se e ka ndërmend të mbetet aty në periudhë afatgjate.

“Dëshiroj të mbetem në Djurgarden, nuk kam arsye të ngutem dhe dëshiroj të kem eksperiencë të suksesshme në Djurgarden. Dëshiroj të fitoj tituj, kjo është e tëra që po e mendoj”, deklaroi ai për ueb faqen fotbolldirekt.se.

“Nuk do të largohem këtë vjeshtë e as sezonin tjetër. Përse do të duhej të largohesha? E dua këtë klub dhe dëshiroj të mbetem së paku edhe sezonin tjetër. Kam nënshkruar kontratë për katër vjet dhe dëshiroj të jem i qetë e të ambientohem. Kam hasur në mikpritje të shkëlqyer që ma bënë shokët e skuadrës dhe tifozët”, vazhdoi Fejzullahu.

Presidenti i Djurgardenit, Tommy Jacobson, ka thënë se nuk mund të premtojë se Fejzullahu do të mbetet në këtë ekip për më shumë se 12 muaj, ngase objektiv i 22 vjeçarit është të luajë në një ligë më të fortë evropiane. “Për momentin po mendoj vetëm për Djurgardenin, të tjerat vijnë me kohë. Nuk kam motiv të vrapoj. Tash po e konstruktoj karrierën time në qetësi”, përfundoi ish futbollisti i Mjallbyt dhe NEC Nijmegenit.