Fol: Deklaratat e pavërteta të politikanëve

Lëvizja Fol ka paraqitur një raport me deklaratat të vërteta dhe të pavërteta të zyrtarëve të lartë të institucioneve të Kosovës dhe atyre ndërkombëtare.

Në një konferencë për media Lëvizja Fol ka prezantuar raportin e verifikimit të deklaratave të zyrtarëve të lartë shtetëror të Kosovës.

Edhe në këtë raport të quajtur matësi i deklaratave të zyrtarëve të lartë, të parët janë zyrtarët qeveritar.

Sipas kësaj lëvizje deklaratë e pavërtetë del të jetë ajo e kryeministrit Hashim Thaçi e dhënë gjatë fushatës zgjedhore të vitit 2010, kur kishte premtuar se brenda 15 muajve qytetarët e Kosovës do të udhëtojnë pa viza në tërë Evropën, raporton portali KosovaTimes.

Arsyetimi i Lëvizjes Fol është se ky premtim është dhënë gjatë fushatës elektorale, mirëpo, ky premtim nuk u realizua dhe si i tillë deklarimi i tij është i pavërtetë.

Deklarata e dytë e vlerësuar si kontradiktore është ajo e ministres së Integrimeve Evropiane Vlora Çitaku, e cila kishte thënë se klasa politike në Kosovë pa përjashtim ka arritur që të kuptojë që lufta kundër krimit të organizuar dhe korrupsionit do të jetë parakusht për proceset e mëtejshme integruese.

Por, sipas drejtuesve të Fol kjo deklaratë e dhënë në vitin 2012, është kontradiktore, pasi sipas kësaj, deklarate klasa politike nuk ishte e vetëdijshme para qershorit të vitit 2012 për rëndësinë e luftimit të korrupsionit si një parakusht për integrim në BE?!

Ndërsa, deklarata e tretë është po ashtu kontradiktore, por kësaj radhe e ministrit të Infrastrukturës Fehmi Mujota, i cili kishte thënë se “Po e them publikisht se edhe tash mund të thuhet se ka keqpërdorime për këtë nivel (në Ministrinë e Infrastrukturës)”.

Sipas Fol, me gjithë keqpërdorimet e shumta në Ministrinë e Infrastrukturë, ministri Mujota bën sikur thuaj ai nuk ka asnjë përgjegjësi për aferat e tilla në ministrinë e tij.

E, kësaj radhe një deklaratë iu doli e vërtetë zyrtarëve të Fol. Është ajo e EULEX-it, se “EULEX-i nuk është duke bërë asgjë në luftën kundër korrupsionit në nivele të larta?”.

Ndërsa, në rendin e deklaratave të pavërteta radhitet edhe ajo e zëvendëskryeministrit Hajredin Kuçi i cili kishte thënë se “Ligji (për konfiskimin e pasurisë së paligjshme) do të nxirret brenda këtij gjashtëmujori dhe ai do të vlejë për të gjithë”.