Fondacioni i Liri Berishës: Po kërkojnë para në emrin tonë

Fondacioni Fëmijët shqiptarë i Liri Berishës ka denoncuar faktin se disa persona janë duke kërkuar para në emër të këtij fondacioni.

Sipas fondacionit, duke u bazuar në deklaratat e disa qytetarëve, disa grupe vajzash janë paraqitur disa herë në familje të ndryshme në Tiranë, për të kërkuar kontributin e tyre financiar në emër të shoqatës së drejtuar nga Liri Berisha.

Por, fondacioni i drejtuar nga Liri Berisha ka deklaruar se këta persona nuk kanë lidhje me këtë fondacion, ndërsa ka kërkuar nisjen e hetimeve nga ana e policisë.

Prej disa vitesh Fondacioni Fëmijët Shqiptare, organizatë jo-qeveritare e jo-fitimprurëse, dhe personalisht Zj. Berisha i kanë dedikuar kohën dhe vëmendjen maksimale fëmijëve me çrregullime të spektrit autik dhe familjeve të tyre. Puna ka qenë e përqëndruar në ndërgjegjësimin e shoqërisë shqiptare për këto çrregullime dhe në ofrimin e shërbimeve për fëmijët e familjet e tyre. Veprimtaria e Fondacionit është mbështetur fuqimisht nga donacionet direkte të biznesit shqiptar e atij të huaj si dhe nga shumë organizata partnere ndërkombëtare. Kjo mbështetje ka qenë gjithmonë e strukturuar, institucionale dhe transparente, gjë e cila ka ndihmuar Fondacionin të ketë arritje pozitive si në rrafshin kombëtar, në atë rajonal e më gjerë thuhet në deklaratën e fondacionit.

Megjithatë, financimi i fondacionit të Liri Berishës ka qenë object debate, pasi mendohet që biznesmenë të ndryshëm, për të pasur favore nga kryeministri Berisha, paguajnë për këtë fondacion.