Francë, socialistët në ankth përpara zgjedhjeve

Partia Socialiste në Francë është në prag të regjistrimit të një fitoreje në zgjedhjet parlamentare të së dielës, por formimi i një koalicini qeverisës mund të rezultojë më i vështirë nga sa parashkohet, për shkak të mosmarrëveshjeve me aleatët ambientalistë dhe përfaqësuesit e së majtës radikale.

Sipas sondazheve parazgjedhore, socialistët pritet që pas fitores së Hollande në zgjedhjet presidenciale, të renditen të parët edhe në zgjedhjet e 10 dhe 17 qershorit.

Megjithatë, në javët e fundit diferenca me kundërshtarët kryesorë ka ardhur në zvogëlim dhe pritet që diferenca me partinë e ish-presidentit Nicolas Sarkozy, të jetë prej vetëm 1-2%.

Konkretisht, parashikohet që të majtët të sigurojnë 32% të votave, por “UMP” mundet ende të rikuperojë në dy ditët e ardhshme dhe të sigurojë një fitore të papritur.

Nëse kjo do të ndodhë, presidenti Francois Hollande do të ishte i detyruar të shkarkonte nga detyra kryeministrin e sapozgjedhur, Jean-Marc Ayrault dhe të zgjidhte një tjetër kryeministër nga radhët e “UMP”-së.

Një koalicion me të djathtën është ajo që socialistët duan të shmangin me çdo kusht, por sidoqoftë, bashkëpunimi me partinë e gjelbërt dhe radikalët e majtë, sipas mediave franceze parashikohet gjithsesi i vështirë.