Fratar, Ruçi: Naftën do ta kthejmë pasuri për mirëqenien e qytetarëve

Fier- Deputeti Gramoz Ruçi, i cili udhëheq skuadrën e kandidatëve për deputetë në qarkun Fier, ka zhvilluar takim me banorët e komunës së Fratarit, ku është angazhuar në emër të Partisë Socialiste për shëndetësi falas, për heqjen e akcizës së naftës, për heqjen e taksës së qarkullimit të naftës për bujqësinë. 

Duke u ndalur edhe te pasuria e nëntokës së zonës, e cila sipas tij sot nuk prodhon mirëqenie për banorët që jetojnë aty, Ruçi tha se do të kthejnë naftën në mirëqenie për të gjithë Mallakastrën dhe Fierin dhe jo siç është sot një pasuri që shfrytëzohet dhe nxjerr përfitime vetëm për klientët e pushtetit.

E para, ne duam ti kthejmë Mallakastrës dhe qarkut të Fierit naftën. Ne duam të kthejmë naftëtarët tek nafta. Ne duam ti kthejmë Mallakastrës uzinën. Ne duam të kthejmë Fratarin në punë. Ne duam të kthejmë naftën në interes të qytetarëve shqiptarë dhe jo të hajdutëve qeveritarë, është angazhuar Gramoz Ruçi në Fratar.

Ruçi u shpreh se të gjithë shqiptarët pavarësisht bindjeve politike, në 23 qershor duhet të kuptojnë se nuk ka arsye të sillen si tifozë, pasi vota në 23 Qershor është një votë për të mbyllur një epokë, një epokë të rrënimit, të papunësisë, të korrupsionit, të varfërisë, të gënjeshtrës dhe për të hapur një epokë të re, një epokë të Rilindjes për punësimin, për mbështetje të biznesit të vogël dhe për mbështetjen reale të fshatit shqiptar.

Nafta e Mallakastrës dhe e Fierit ka ikur në drejtim të paditur. Ja pse them që nuk duhet të votojmë si tifozë, por të votojmë si qytetarë, të votojmë si Mallakastriotë, duhet të votojmë si shqiptarë, tha në këtë takim elektoral Gramoz Ruçi.