Fukushima/ Nuk gjendet asnjë radioaktivitet në det pas lëshimit të ujit nga Japonia

Qeveria japoneze tha se testet e ujit të detit nga termocentrali bërthamor Fukushima nuk tregojnë nivele të dallueshme radioaktiviteti. Ajo po kërkon të zbusë shqetësimet nga vendet fqinje dhe grupet e peshkimit në lidhje me lëshimin e ujit të trajtuar në oqean.

Rezultatet javore të testit do të publikohen për tre muajt e ardhshëm. Më shumë se një milion ton ujë të depozituar në centralin bërthamor do të shkarkohet gjatë 30 viteve të ardhshme në det.

Ai është grumbulluar që nga viti 2011 kur uzina u dëmtua rëndë nga një cunami. Japonia thotë se uji është i sigurt dhe mbikëqyrësi bërthamor i OKB-së ka miratuar planin, por kritikët thonë se lëshimi duhet të ndalet.

Uji po filtrohet për të hequr shumicën e elementëve radioaktivë dhe më pas hollohet për të reduktuar nivelet e tritiumit, një izotop radioaktiv i hidrogjenit i cili është i vështirë të ndahet nga uji.

Ministria e Mjedisit tha se mostrat nga 11 vende pranë uzinës treguan nivele tritium nën 7-8 bekerel për litër, kufiri i poshtëm i zbulimit dhe se uji “nuk do të kishte ndikim negativ në shëndetin e njerëzve dhe mjedisin”, shtoi ai.

Rezultatet e testit erdhën pasi Kina e përshkroi shkarkimin si një “akt jashtëzakonisht egoist dhe të papërgjegjshëm”. Të enjten ajo tha se do të bllokonte të gjitha importet e ushqimeve të detit japonez./BBC/

/rtsh.al/