GJERMANI – Scholz mbërrin në Magdeburg, me flamujt në gjysmështizë në mbarë vendin
MAGDEBURG, 21 dhjetor /ATSH-DPA/ – Kancelari Olaf Scholz dhe zyrtarë të tjerë të lartë, përfshirë ministren e Brendshme, Nancy Faeser dhe ministrin e Drejtësisë Volker Wissing, vizituan sot skenën e incidentit vdekjeprurës të përplasjes me makinë në tregun e Krishtlindjeve në Magdeburg.
Të paktën katër persona kanë vdekur, duke përfshirë një fëmijë, dhe 41 persona u plagosën rëndë pasi një makinë u përplas në turmë të premten në mbrëmje.
Disa media raportojnë se mbi 200 persona janë lënduar.
”I dyshuari, i cili është në paraburgim policor, është një mjek dhe shtetas saudit i cili jeton dhe punon në Bernburg, një qytet në jug të Magdeburgut”, thanë zyrtarët.
Scholz dhe shoqëruesi i tij u takuan fillimisht me zyrtarë rajonalë të kabinetit, duke përfshirë kryeministrin e landit Saksoni-Anhalt, Reiner Haseloff.
Ministrja e Brendshme Faeser urdhëroi sot në mëngjes që të gjithë flamujt në të gjitha ndërtesat federale të ishin në gjysmështizë në mbarë vendin.
Një shërbim përkujtimor do të mbahet në katedralen e Magdeburgut në orën 19:00 (18:00 GMT)./ a.jor.