Gazetarët në veri të pambrojtur

Sulmet ndaj gazetarëve në veri të Mitrovicës nuk kanë të ndalur. Drejtues të Shoqatës së Gazetarëve të Mitrovicës, kanë apeluar tek organet kompetente që të ndërmarrin masat e duhura për sigurinë e gazetarëve në këtë rajon. Sipas tyre, gazetarët shqiptarë që kryejnë punën e tyre në veri të Mitrovicës, nuk po mbrohen nga askush, madje as nga KFOR-i, EULEX-i e Policia e Kosovës.

E në anën tjetër, Policia e Kosovës ka paralajmëruar se do të merren masa disiplinore ndaj të gjithë atyre pjesëtarëve të Policisë së Kosovës që veprojnë në veri të Mitrovicës, e që nuk u binden urdhrave të zinxhirit komandues, raporton Kosovapress.

Rasti i fundit i sulmit të protestuesve serbë ndaj gazetarit të Agjencisë së Lajmeve Kosovapress, Alidin Damati dhe atij të Koha Ditore, Musa Mustafa, është reflektimi më i mirë i gjendjes së brishtë në veri të vendit.

Madje protestuesit serbë, sulmin ndaj dy gazetarëve shqiptarë e kanë bërë në prani të Policisë së Kosovës dhe KFOR-it, e ky fakt po i brengosë më së shumti gazetarët që punojnë dhe veprojnë në atë pjesë të Kosovës.

Gazetarët Damati dhe Mustafa, të enjten ishin duke e përcjellë protestën në veri të Mitrovicës, përderisa janë sulmuar nga një grup huliganësh serbë, duke i fyer ata në baza nacionale.