Greqi, pranga pedofilit, përdhunoi 2 fëmijë shqiptarë

PATRA-Përfundon në pranga pedofili grek që përdhunoi dy fëmijë shqiptarë. I gjithë opinioni publik në qytetin e Patrës në Greqi është tronditur pas arrestimit të një 60-vjeçari në lagjen Zavlaniu të qytetit. Sipas policisë greke, i arrestuari akuzohet për përdhunim të një djali 6-vjeçar nga Shqipëria si dhe për abuzim seksual ndaj motrës së tij 11 vjeçe. I akuzuari, me profesion peshkatar, përdhunonte prej dy vitesh vogëlushin shqiptar, duke abuzuar në miqësinë që kishte me familjen e tij. Policia ka bërë të ditur gjithashtu se 60-vjeçari shpesh shihte së bashku me prindërit e dy fëmijëve në shtëpinë e tyre filma me përmbajtje pornografike. Skandalin seksual e ka denoncuar në policinë e Patrës një banor i zonës dhe pas kësaj menjëherë është kryer arrestimi. Pas vizitës që mjeku ligjor i ka bërë 6-vjeçarit shqiptar, ai ka konstatuar në trupin e tij dëmtime në organet e tij gjenitale, shenja në gjithë trupin e tij si dhe dëmtime të pjesës së pasme të trupit. Sipas shtypit vendas, kohët e fundit shumë prej banorëve e dinin se çfarë ndodhte në shtëpinë e emigrantëve shqiptarë me dy fëmijët që kishin rënë pre e orekseve të sëmura të pedofilit grek, por askush nuk kishte marrë guximin të denonconte. Madje informacione të shtypit grek bënin të ditur se vetë nëna e dy fëmijëve ishte bashkëpunëtore në këto veprime të sëmura të 60-vjeçarit, por deklaratat e avokatit të familjes shqiptare e hedhin poshtë këtë version. Sipas avokatit të emigrantëve shqiptarë, Janis Apostolopulos, nëna e fëmijëve nuk ka asnjë dijeni dhe e konsideron të pamundur faktin që një nënë, sado nivel të ulët ekonomik dhe social të ketë, të pranojë të tilla veprime në dëm të fëmijëve të saj.