Guterres: Siria, tragjedia më e madhe e shekullit

Organizata e Kombeve të Bashkuara ka deklaruar se rreth dy milionë refugjatë janë larguar nga Siria për shkak të Luftës Civile dhe se nurmi i refugjatëve është rritur pothuajse për 10 herë gjatë 12 muajve të kaluar.

Komisionari i lartë i OKB-së për refugjatë, Antonio Guterres, tha se Siria është shndërruar në tragjedinë më të madhe të këtij shekulli.

Sipas Agjencisë së Kombeve të Bashkuara për Refugjatët (UNHCR), afro 5 mijë vetë largohen nga Siria në vendet fqinje, çdo ditë.

Gjithashtu kjo agjenci thekson se numri i njerëzve të zhvendosur brenda Sirisë është afro 4.25 milionë.

Ministrat nga Iraku, Jordania, Libani dhe Turqia, katër vendet që kanë refugjatë nga Siria, do të takohen nesër në Gjenevë me zyrtarët nga agjencia UNHCR, për të kërkuar mënyra për rritjen e ndihmës ndërkombëtare për refugjatët.