Hungaria miraton kushtetutën e re

Parlamenti i Hungarisë ka miratuar sot kushtetutën e re vetëm me votat e koalicionit të qendrës së djathtë, i cili ka shumicën e dy të tretave.

Kushtetuta e re u miratua me 262 vota nga kolicioni në pushtet Fidesz-KDNP, 44 deputetë votuan kundër dhe njëri abstenoi.

Socialistët dhe liberalët e bojkotuan votimin, duke pohuar se ndryshimet nuk janë bërë me consensus. Partia Fidesz e kryeministrit Viktor Orban tha se i ka propozuar ndryshimet për ta kompletuar procesin e demokratizimit të vendit të filluar në vitin 1989, kur kolapsoi regjimi komunist.

Kushtetuta e re e kufizon pushtetin e gjykatës së lartë në çështjet e buxhetit, dhe i lejon presidentit të shpërndajë parlamentin nëse buxheti nuk miratohet deri në muajin prill.

Kushtetuta hyn në fuqi në 1 janar, 2012.