Ian Cliff, ambasador i ri britanik në Kosovë

Ian Cameron Cliff është emëruar ambasador i ri i Britanisë së Madhe në Republikën e Kosovës, duke zëvendësuar kështu Andy Sparkes, i cili kohë më parë është zgjedhur zëvendësshef i EULEX-it.

Ambasada britanike në Prishtinë përmes një komunikate për media bëri të ditur se Cliff do të marrë detyrën e ambasadorit gjatë muajit mars.

Për emërimin e tij si ambasador në Republikën e Kosovës, Cliff tha do të punojë ngushtë me institucionet e Kosovës në të gjitha fushat, e sidomos në procesin e integrimeve.

“Unë jam i kënaqur që do të kthehen në Ballkan. Mbretëria e Bashkuar ka qenë një nga përkrahësit më të fortë të Kosovës që nga viti 1999 dhe unë pres që të punojnë me Qeverinë e Kosovës dhe të gjitha komunitet e Kosovës në rrugën e integrimit euro-atlantik”, ka thënë ai.

Cliff theksoi se ekzistojnë edhe sfida të rëndësishme përpara sidomos me formimin e një Qeverie të re të Kosovës dhe fillimin e dialogut Beograd-Prishtinë.

Diplomati Cliff është angazhuar në Ministrinë e Jashtme të Britanisë që nga viti 1979 dhe ka qenë ambasador i Britanisë së Madhe në Bosnje e Hercegovinë, në Sudan dhe OSBE. Ai thuhet se ka përvojë në zgjedhjen e konflikteve dhe rindërtimin pas konflikteve, kurse kishte shërbyer në Misionin e Britanisë së Madhe në OKB në Nju Jork, në kohën e krizës në Irak dhe Kuvajt. Ian Cliff është i martuar me Caroline Cliff dhe ka tre fëmijë.