Impiantet atomike Irani fton diplomatet

Irani ka ftuar diplomatët e huaj që të vizitojnë impiantet e tij bërthamore, njoftojnë agjencitë ndërkombëtare të lajmeve.

Ftesa, e cila nuk është konfirmuar zyrtarisht nga Teherani, vjen në prag të bisedimeve të reja me fuqitë botërore mbi programin bërthamor iranian.

Delegatë nga Rusia, Kina dhe vende të BE-së janë mes diplomatëve të ftuar, mes të cilëve mungojnë ata të Shteteve të Bashkuara.

Shumë vende të Perëndimit dyshojnë se Irani po zhvillon bombën atomike, por Teherani e mohon një gjë të tillë duke deklaruar se programi i tij është tërësisht paqësor.

Një diplomat i vjetër në Bruksel ka deklaruar për agjencinë e lajmeve “Reuters” se Irani ka ftuar ambasadorë të shumtë të akredituar pranë ANEB-së.

Ndërsa “Associated Press” njofton se ka parë një letër, në të cilën diplomati iranian Ali Asghar Soltanieh sugjeron datat 15 dhe 16 janar për vizitat.

Më shumë nga Ndërkombëtare