Isabella Ferrari nxit debate në Romë

Ndonëse bëhet fjalë për një film të regjisorit të talentuar, Paolo Franchi, ku skenat nudo nuk janë detyrimisht të pëlqyeshme, por as shokuese, sekuencat e filmit “E la chiamano estate” ku Isabella Ferrari shfaqet nudo janë debatuar shumë gjatë Festivalit të Filmit në Romë.

Filmi pritet të shfaqet mbrëmjen e sotme, ndërsa sot në mëngjes Isabella Ferrari u ka rrëfyer gazetarëve, se si ka pranuar rolin e Anna’s.

“Kur Paolo Franchi më propozoi të bëja këtë rol, duhet ta pranoj se nuk e kisha kuptuar mirë. Por për mua, regjisori është i rëndësishëm dhe pasi e takova, vendosa të pranoja ofertën. Paolo më ka kërkuar të mos rindërtoj asgjë, të mos krijoja maska dhe kjo për mua ka qenë diçka e bukur. Në xhirimin e skenave nudo nuk kam ndjerë aspak siklet, pasi vija pas një pune të gjatë me regjisorin”, u shpreh ajo.