Ish kryeministri Georgievski: Maqedonasit, falsifikuesit e historisë ballkanase

Deklarata në librin e tij “Ky jam unë”

Maqedonasit janë falsifikuesit më të mëdhenj të historisë së Ballkanit, ka shkruar ish-kryeministri dhe lideri aktual i VMRO-Popullore në Maqedoni, Lubço Georgievski në librin e tij ‘”Ky jam unë”. Në këtë libër me shumë detaje edhe për luftën e Kosovës dhe zhvillimet e tjera në rajon, Georgievski ka folur edhe për luftën në Kosovë në vitin 1999. Sipas tij, në luftën e Kosovës ai ka qenë i lidhur drejtpërdrejt me Shtëpinë e Bardhë në Uashington, ku ka  marrë udhëzime për lejimin e NATO-s për hyrjen në Kosovë. “Ish-sekretarja amerikane Albraight atëherë kërkoi leje që përmes territorit tonë të sulmojnë Serbinë, edhe përmes frontit tokësor”, ka shkruar Georgievski. Sipas tij, në takimet me ish-kryeministrin serb Zoran Gjingjic ka biseduar edhe për shkëmbimin e territoreve midis Maqedonisë, Shqipërisë dhe Kosovës, ndërsa të njëjtën çështje e ka diskutuar edhe me Arbër Xhaferin, i cili ishte pjesë e koalicionit të përbashkët qeveritar mes VMRO-DPMNE dhe PDSH atëkohë, gjatë konfliktit të vitit 2001 në Maqedoni. Këto detaje të këtij libri janë nxjerrë dhe komentuar nga disa media maqedonase dhe serbe.