Ivanoviq: Institucionet serbe në Kosovë nuk do të shuhen

Sekretari shtetëror në Ministrinë për Kosovën të Qeverisë së Serbisë, Oliver Ivanoviq, ka thënë se “institucionet serbe në Kosovë nuk do të pushojnë së ekzistuari, edhe sikur zgjedhjet lokale të shtetit serb të mos mbahen në territorin e Kosovës”.

Duke vlerësuar se zgjedhjet janë të rëndësishme për të gjithë serbët e Kosovës, pa marrë parasysh nëse jetojnë ne jug apo veri të Lumit Ibër, Ivanoviq ka thënë se “nënshkrimi dhe mbajtja e tyre duhet të jenë në përputhje me Kushtetutën dhe Rezolutën 1244”.

Andaj, ka shtuar ai, Serbisë i duhet ndihma e misioneve ndërkombëtare, në mënyrë që zgjedhjet të realizohen teknikisht.

Ivanoviq ka kujtuar se Serbia, nga vitit 1999, “me ose pa pëlqimin e bashkësisë ndërkombëtare, ka mbajtur të gjitha zgjedhjet parlamentare dhe presidenciale në Kosovë”.

“...por, zgjedhjet lokalet nuk i kemi mbajtur deri në vitin 2008. Këto janë elemente, të cilat tregojnë se mundësitë tona teknike do të jenë faktorë që do të ndikojnë në organizimin e zgjedhjeve”, ka thënë Ivanoviq për mediat serbe.