JEMEN – Lëvizja Houthi njofton vdekjen e komandantit të lartë pas sulmeve ajrore izraelite
JEMEN, 16 tetor /ATSH-DPA/- Lëvizja Houthi e Jemenit njoftoi sot vdekjen e shefit të shtabit të saj, Mohammed Abdul Karim al-Ghamari, në atë që dukej të ishte një sulm ajror izraelit që synonte pozicionet e grupit në Jemenin verior.
Al-Ghamari, i konsideruar figura e dytë më e fuqishme në hierarkinë Houthi të mbështetur nga Irani pas udhëheqësit të grupit Abdulmalik al-Houthi, luajti një rol kyç në operacionet ushtarake rajonale të grupit dhe ishte në listën e objektivave prioritarë të Izraelit.
Sulmet izraelite vranë gjithashtu kryeministrin e Houthi, Ahmed al-Rahawi në gusht.
Në një deklaratë të enjten, forcat e armatosura Houthis thanë se komandanti xhihadist, gjeneralmajor Mohammed Abdul Karim al-Ghamari, ishte martirizuar së bashku me disa nga shokët e tij dhe djalin e tij 13-vjeçar, Hussein.
Houthis më vonë njoftuan emërimin e Youssef Hassan al-Madani si shefin e tyre të ri të shtabit.
Nuk dihet saktësisht se kur u vra al-Ghamari. Houthis deklaruan se ai ishte vrarë gjatë sulmeve ajrore.
Sipas raporteve të mediave izraelite, sulmi ajror ndodhi në fund të gushtit. Raportet në atë kohë lanë të paqartë nëse al-Ghamari ishte vrarë menjëherë apo kishte vdekur nga plagët më vonë.
Media izraelite tha se ai ishte shënjestruar nga Izraeli në të paktën dy raste.
Televizioni saudit “al-Arabiya” raportoi se al-Ghamari ishte vrarë gjatë një takimi qeveritar të shënjestruar nga Izraeli në gusht.
Pas fillimit të luftës në Gaza, dy vjet më parë, milicia Houthi filloi të sulmonte objektiva në Izrael dhe në det, veçanërisht anije tregtare të dyshuara se kishin lidhje me Izraelin.
Burime lokale thanë se Izraeli sulmoi objektiva gjatë natës në provincën veriore të Saada, e cila kufizohet me Arabinë Saudite.
Provinca është një fortesë e milicisë, e cila ka kontrolluar Jemenin verior, përfshirë kryeqytetin Sana’a, për 10 vjet.
Javën e kaluar, rebelët Houthis mirëpritën armëpushimin në Gaza dhe një marrëveshje për lirimin e pengjeve të arritur midis Izraelit dhe lëvizjes militante palestineze “Hamas”. //a.i/