Japonia rikthen në punë dy reaktorë

Kryeministri i Japonisë, Joshihiko Noda, ka urdhëruar të shtunën rifillimin e punës në dy reaktorë bërthamorë, e që është rikthimi i parë në funksion i reaktorëve që nga tërmeti dhe cunami i vitit të kaluar, që kanë shkaktuar rrjedhje radioaktive në centralin bërthamor të Fukushimës.

Që nga fatkeqësia, të 50 reaktorët e vendit janë mbyllur për shkak të testimeve.

Noda ka dhënë dritën e gjelbër për riaktivizimin e reaktorëve numër 3 dhe 4 në centralin Oi, pranë Kiotos.

Ministri i Tregtisë dhe Industrisë, Jukio Edano, tha se siguria mbetet prioritet i lartë.

“Do të kalojë kohë derisa reaktorët të nisin të gjenerojnë energji, andaj edhe u kërkojmë njerëzve të vazhdojnë të ruajnë energjinë”, ka thënë Edano.

Zemërimi publik kundër energjisë bërthamore ka qenë i lartë që nga aksidenti në Fukushima, i cili ishte më i rëndi që nga fatkeqësia bërthamore në Chernobil, më 1986.

Pas katastrofës së vitit të kaluar në Fukushimë, dhjetëra-mijëra njerëz janë detyruar të lënë shtëpitë, pasi shumë zona mbeten me nivele të larta të rrezatimit.