KFOR Situata ende shqetesuese

Komanda e KFOR-it ka njoftuar se situata në pikat kufitare 1 dhe 31 në veri të Kosovës vazhdon të jetë e tensionuar, pavarësisht se nata që kaloi ka qenë e qetë.

Përmes një komunikate për shtyp, komanda e udhëhequr nga gjenerali Erhard Byhler bën të ditur se rregullat mbi gjendjen e këtyre dy pikave nuk kanë ndryshuar.

Ato vazhdojnë të konsiderohen zona ushtarake të kufizuara dhe kalimi i kufirit për kamionët dhe makinat e mëdha nuk lejohet.

Makinat e vogla, saktësohet në komunikatë, do të lejohen të kalojnë kufirin por do t’u nënshtrohen kontrolleve dhe drejtuesit e tyre do të jenë vetë përgjegjës për sigurinë.

“Në portën 31 në Bërnjak kontrollet janë shumë të rrepta për arsye sigurie”, thuhet më tej në komunikatën për shtyp të KFOR.