KOMENT – Çfarë nënkupton një presidencë e dytë e Trump për Britaninë e Madhe?

LONDËR, 6 nëntor /ATSH-DPA/- Donald Trump do të kthehet në Shtëpinë e Bardhë pasi deklaroi se kishte arritur një “fitore madhështore” në zgjedhjet amerikane.

Kryeministri i Britanisë së Madhe Keir Starmer shpejtoi për të uruar presidentin e zgjedhur, së bashku me sekretarin e tij të jashtëm David Lammy, dhe qeveria shfaqet e gatshme për të përmirësuar marrëdhëniet me administratën e ardhshme.

Çfarë mund të nënkuptojë një presidencë e dytë e Trump për Britaninë e Madhe? Çfarë mund të ndodhë brenda ekonomisë së BM-së?

Presidenti i sapozgjedhur Trump është zotuar të vendosë tarifa për importet në SHBA, një lëvizje që mund të ketë ndikim në ekonominë e të gjithë globit.

Bronwen Maddox, drejtor i grupit të ekspertëve për punët e jashtme ne “Chatham House” – Instituti Mbretëror i Çështjeve Ndërkombëtare, me qendër në Londër – beson se tarifat do të ishin ndoshta një nga gjërat e para që Britania e Madhe do të vinte re nën drejtimin e Donald Trump – dhe se ato nuk do të ndikonin pozitivisht në rritjen ekonomike – që Keir Starmer po i kushton kaq shumë rëndësi.

Ka pasur pyetje në lidhje me natyrën e marrëdhënies së ardhshme të Starmer dhe presidentit të zgjedhur, Trump si rezultat i deklarateve të mëparshme të bëra nga Lammy dhe ankesës së paraqitur për aktivistët laburistë gjatë fushatës.

Qeveria do të jetë e prirur të ndërtojë marrëdhënie të mira me administratën e ardhshme pasi fushata e politikanit republikan ngriti një ankesë ligjore për aktivistët laburistë që mbështesnin Kamala Harris.

Gjithashtu, Lammy ka kërkuar të krijojë një marrëdhënie të ngushtë me Trump – ndërkohë që ai bënte fushatë – pavarësisht një historie kritikash të hapura për të dhënat e tij – duke e quajtur atë një “racist dhe simpatizant të KKK/neo-nazistëve” në 2017 dhe një “tiran në xhufkë” një vit më vonë.

Ndërkohë Starmer ishte një nga liderët e parë botërorë që uroi Trumpin për fitoren e tij dhe iu referua marrëdhënies se veçantë për të cilën ai tha se do të vazhdonte të përparonte pas rezultatit të zgjedhjeve në SHBA.

“Si aleatët më të afërt, ne qëndrojmë krah për krah në mbrojtje të vlerave tona të përbashkëta të lirisë, demokracisë dhe sipërmarrjes”, tha Starmer në një deklaratë sot në mëngjes.

Çfarë ka bërë Britania e Madhe për të provuar dhe përmirësuar marrëdhëniet?

Ka pasur përpjekje për të arritur një marrëdhënie të mirë me Trump dhe ekipin e tij.

Kryeministri Starmer u takua me presidentin e zgjedhur amerikan në Trump Tower gjatë një vizite në Nju Jork në shtator.

Starmer tha në atë kohë se donte të takohej pasi ai besonte shumë në marrëdhëniet personale në skenën botërore. //a.i/