KOMENT – Demokratët mbështesin publikisht Harris pas tërheqjes së Biden nga gara presidenciale
UASHINGTON, 22 korrik /ATSH-DPA/- Pas vendimit të presidentit amerikan Joe Biden për t’i dhënë fund kandidaturës së tij për rizgjedhje në garën e vitit 2024, demokratët kanë shfaqur publikisht mbështetjen e tyre për zëvendëspresidenten Kamala Harris.
59-vjeçarja shihet si kandidatja më e mundshme zëvendësuese – pasi ka marrë mbështetjen e vetë Biden dhe shumë demokratëve të tjerë kryesorë.
Deri më tani, asnjë figurë e madhe partiake nuk ka thënë se do të kandidonte kundër saj.
Vendimi përfundimtar do të merret në Konventën Kombëtare Demokratike që do të zhvillohet në Çikago nga 19 deri më 22 gusht, megjithëse një konsensus partiak mund të formohet shumë përpara kësaj.
Të dielën, 81-vjeçari Biden premtoi “mbështetje të plotë” për Harris dhe tha se ai do të përfundonte pjesën e mbetur të mandatit të tij, i cili përfundon më 20 janar 2025.
Kampi që rrethon kandidatin e sapo emëruar republikan, Donald Trump, reagoi me zemërim ndaj tërheqjes së Biden.
Trump postoi një mori komentesh të ashpra në platformën e tij “Truth Social”, duke u ankuar për kohën dhe paratë që ekipi i tij kishte investuar “për të luftuar kundër Joe Biden”.
“Tani duhet të fillojmë nga e para”, shkroi Trump.
Demokratët kanë shfaqur shpejt mbështetjen për Harris, duke përfshirë guvernatorët Gavin Newsom (Kaliforni), Josh Shapiro (Pensilvani) dhe Roy Cooper (Karolina e Veriut). Të tre ishin shpallur javët e fundit si kandidatë të mundshëm për të zëvendësuar Biden.
Nga krahu i majtë i partisë, Harris mori mbështetje nga kongresmenja Alexandria Ocasio-Cortez.
Përveç mposhtjes së drejtpërdrejtë të Trump, shumë demokratë shpresojnë që Harris të paktën të parandalojë që republikanët të marrin kontrollin e të dy dhomave të legjislaturës.
Të gjitha vendet në Dhomën e Përfaqësuesve dhe rreth një e treta e vendeve në Senat do të fitohen në zgjedhjet e vjeshtës.
Me tërheqjen e Biden, Trump është kandidati më i vjetër presidencial në historinë e SHBA-së.
78-vjeçari u zgjodh zyrtarisht si kandidat i partisë së tij në konventën e Partisë Republikane në Milwaukee javën e kaluar. //a.i/