KOMENT – Trump shpall tarifat gjithëpërfshirëse në ngjarjen e përcaktuar si “Dita e çlirimit”

UASHINGTON, 2 prill /ATSH-DPA/ – Presidenti i SHBA Donald Trump do të zbulojë sot një raund të ri tarifash gjithëpërfshirëse, të ashtuquajturën “Dita e çlirimit”, duke e inkuadruar masën si një shtytje për tregti më të drejtë.

Trump po premton “tarifa reciproke” të reja për të ndëshkuar vendet e tjera për tarifat dhe barrierat e tyre tregtare.

Kjo do të sillte rritjen e tarifave nga SHBA-ja kudo ku ajo tarifon më pak se partnerët e saj tregtarë.

Megjithatë, mbetet e paqartë nëse administrata mund të vendosë tarifa të përgjithshme në të gjithë industritë në vend që të synojë mallra specifike.

Dhe shtrirja dhe shkalla e masave të reja, duke përfshirë vendet dhe sektorët që do të preken, ende nuk janë zbuluar.

Trump do ta bëjë njoftimin në një ngjarje në orën 16:00 (22:00 GMT) në Kopshtin e Trëndafilave të Shtëpisë së Bardhë.

“2 Prilli është Dita e çlirimit në Amerikë!!! Për dekada të tëra ne jemi grabitur dhe abuzuar nga çdo komb në botë, si mik ashtu edhe armik. Tani është më në fund koha që SHBA të marrin një pjesë të atyre parave. Zoti e bekoftë Amerikën!!!”, shkruan Trump në rrjetet sociale.

Brukseli do të vëzhgojë nga afër, veçanërisht teksa ai përshkallëzon retorikën e tij kundër Bashkimit Evropian.

Trump shpesh sulmon bllokun 27-vendesh për bilancin e tregtisë, veçanërisht duke pasur parasysh vëllimin më të lartë të mallrave evropiane të shitura në SHBA krahasuar me eksportet e SHBA-së në BE.

Megjithatë, BE-ja është një importuese neto e shërbimeve të SHBA-së.

Presidentja e Komisionit Evropian Ursula von der Leyen ka thënë se Brukseli po përgatitet për tarifa të reja speciale për gjysmëpërçuesit, produktet farmaceutike dhe lëndën drusore, përveç tarifave të mëtejshme reciproke.

Tarifat më të larta për të gjitha makinat e importuara nga SHBA janë vendosur tashmë të hyjnë në fuqi nga e enjtja, gjë që do të ndikojë në gjigantët gjermanë të automobilave./ /os/