Kabuli mirëpret lirimin e talebanëve

Kreu i Këshillit për Paqe në Afganistan, Salahuddin Rabbani, ka vlerësuar lart vendimin e Pakistanit fqinj për të liruar nëntë militantë talebanë, të cilët favorizojnë bisedimet për paqe.

Rabbani ka thënë se ky hap sinjalizon gatishmërinë e Islamabadit për të përfshirë grupin militant në fundin e luftës 11-vjeçare të Afganistanit.

Ai i ka bërë këto komente pas kthimit nga Pakistani, ku ka mbikëqyrur lirimin e nëntë talebanëve dhe ka lobuar për lirime të tjera.

Në të kaluarën, Afganistani ka akuzuar Pakistanin për strehim të kryengritësve, gjë që është hedhur poshtë nga Islamabadi.